ಕಾವೇರಿ ಕೊಳ್ಳದಲ್ಲಿ ಎದುರಾಯ್ತು ಕುಡಿಯುವ ನೀರಿನ ಅಭಾವ: ಕೆಆರ್‌ಎಸ್ ಜಲಾಶಯ ಖಾಲಿ, ರೈತರಲ್ಲಿ ಹೆಚ್ಚಿದ ಭೀತಿ!

ಬೆಂಗಳೂರು:ರಾಜ್ಯದ ಜೀವನದಿ ಕಾವೇರಿ ಕೊಳ್ಳದಲ್ಲಿ ಜಲಕಂಟಕದ ಭೀತಿ ಎದುರಾಗಿದೆ. ಕಾವೇರಿ ನದಿಯ ಪ್ರಮುಖ ಜಲಾಶಯವಾದ ಕೃಷ್ಣರಾಜಸಾಗರ (KRS) ಅಣೆಕಟ್ಟಿನಲ್ಲಿ ಬಳಕೆಗೆ ಲಭ್ಯವಿರುವ ನೀರಿನ ಪ್ರಮಾಣ ಕೇವಲ 8.747 ಟಿಎಂಸಿ (TMC) ಗೆ ಕುಸಿದಿದ್ದು, ಇದೇ ಸಂದರ್ಭದಲ್ಲಿ ನೆರೆ ರಾಜ್ಯ ತಮಿಳುನಾಡಿಗೆ ನೀರು ಬಿಡುಗಡೆ ಮಾಡುವಂತೆ ಬಂದಿರುವ ಆದೇಶ ಕರ್ನಾಟಕದಲ್ಲಿ ತೀವ್ರ ಆತಂಕ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ.

ಜಲಾಶಯದ ಒಟ್ಟು ಸಂಗ್ರಹಣಾ ಸಾಮರ್ಥ್ಯಕ್ಕೆ ಹೋಲಿಸಿದರೆ, ಪ್ರಸ್ತುತ ಲಭ್ಯವಿರುವ ನೀರು ಅತ್ಯಂತ ಕನಿಷ್ಠ ಮಟ್ಟದಲ್ಲಿದೆ. ಜಲಾಶಯದಲ್ಲಿರುವ ʼಡೆಡ್ ಸ್ಟೋರೇಜ್ ʼ(ಬಳಕೆಗೆ ಸಿಗದ ತಳಭಾಗದ ನೀರು) ಹೊರತುಪಡಿಸಿದರೆ, ಕುಡಿಯಲು ಮತ್ತು ಕೃಷಿಗೆ ಬಳಸಬಹುದಾದ ‘ಲೈವ್ ಸ್ಟೋರೇಜ್’ ನೀರು ಕೇವಲ 8.747 ಟಿಎಂಸಿ ಮಾತ್ರವಿದೆ.

ಕರ್ನಾಟಕಕ್ಕೆ ಎದುರಾಗಿರುವ ಪ್ರಮುಖ ಸವಾಲುಗಳು:

• ಕುಡಿಯುವ ನೀರಿನ ಅಭಾವದ ಭೀತಿ: ರಾಜಧಾನಿ ಬೆಂಗಳೂರು, ಮೈಸೂರು, ಮಂಡ್ಯ ಹಾಗೂ ರಾಮನಗರ ಸೇರಿದಂತೆ ಹಲವು ನಗರ ಮತ್ತು ಗ್ರಾಮೀಣ ಪ್ರದೇಶಗಳ ಕುಡಿಯುವ ನೀರಿನ ಪೂರೈಕೆಗೆ ಪ್ರತಿತಿಂಘಳು ಗಣನೀಯ ಪ್ರಮಾಣದ ನೀರು ಅಗತ್ಯವಿದೆ. ಪ್ರಸ್ತುತ ಕೆಆರ್‌ಎಸ್‌ನಲ್ಲಿರುವ ನೀರು ಮುಂದಿನ ಕೆಲವು ವಾರಗಳ ಕುಡಿಯುವ ನೀರಿನ ಅಗತ್ಯವನ್ನು ಪೂರೈಸಲು ಮಾತ್ರ ಸಾಲುತ್ತದೆ.
• ಕೃಷಿ ಚಟುವಟಿಕೆಗೆ ಹೊಡೆತ: ಕಾವೇರಿ ಅಚ್ಚುಕಟ್ಟು ಪ್ರದೇಶದ ರೈತರು ಈಗಾಗಲೇ ಬೆಳೆಗಳಿಗೆ ನೀರಿನ ಅಭಾವ ಎದುರಿಸುತ್ತಿದ್ದಾರೆ. ಈ ಹಂತದಲ್ಲಿ ಜಲಾಶಯದಿಂದ ತಮಿಳುನಾಡಿಗೆ ನೀರು ಹರಿಸಿದರೆ, ನಿಂತ ಬೆಳೆಗಳು ಒಣಗಿ ಹೋಗುವ ಭೀತಿ ರೈತರನ್ನು ಆವರಿಸಿದೆ.
• ಪ್ರಾಧಿಕಾರದ ಆದೇಶ ಮತ್ತು ರಾಜ್ಯದ ಇಕ್ಕಟ್ಟು: ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರ (CWMA) ನೀರು ಬಿಡುಗಡೆ ಮಾಡುವಂತೆ ಸೂಚನೆ ನೀಡಿರುವುದು ರಾಜ್ಯ ಸರ್ಕಾರವನ್ನು ತೀವ್ರ ಇಕ್ಕಟ್ಟಿಗೆ ಸಿಲುಕಿಸಿದೆ. ಸ್ವತಃ ತನಗೇ ನೀರಿನ ಅಭಾವವಿರುವಾಗ ತಮಿಳುನಾಡಿನ ಬೇಡಿಕೆ ಈಡೇರಿಸುವುದು ಹೇಗೆ ಎಂಬ ಪ್ರಶ್ನೆ ಎದ್ದಿದೆ.

ರಾಜ್ಯದಲ್ಲಿ ಮುಂಗಾರು ಮಳೆಯ ಅಭಾವದಿಂದ ಜಲಾಶಯಗಳು ಭರ್ತಿಯಾಗಿಲ್ಲ. ಈ ವಾಸ್ತವ ಸ್ಥಿತಿಯನ್ನು ಸುಪ್ರೀಂ ಕೋರ್ಟ್ ಹಾಗೂ ಕಾವೇರಿ ಪ್ರಾಧಿಕಾರದ ಮುಂದೆ ಗಟ್ಟಿಯಾಗಿ ಮಂಡಿಸಬೇಕಾದ ಅನಿವಾರ್ಯತೆ ಸರ್ಕಾರಕ್ಕಿದೆ. ಕುಡಿಯುವ ನೀರಿನ ಭದ್ರತೆಗೆ ಮೊದಲ ಆದ್ಯತೆ ನೀಡಿ, ತಮಿಳುನಾಡಿಗೆ ನೀರು ಹರಿಸುವುದನ್ನು ತಕ್ಷಣವೇ ತಡೆಯಲು ಕಾನೂನು ಹೋರಾಟ ಮತ್ತು ಸರ್ವಪಕ್ಷಗಳ ಬೆಂಬಲದೊಂದಿಗೆ ರಾಜಕೀಯ ಒಮ್ಮತ ಮೂಡಿಸುವುದು ಈಗಿನ ತುರ್ತು ಅಗತ್ಯವಾಗಿದೆ.