ಶೀಘ್ರದಲ್ಲೇ ನಿಮ್ಮ ಕೈಸೇರಲಿದೆ 10, 20 ರೂ. ಪ್ಲಾಸ್ಟಿಕ್ ನೋಟು: RBI ಪ್ರಸ್ತಾವನೆಗೆ ಕೇಂದ್ರ ಸರ್ಕಾರದ ಗ್ರೀನ್ ಸಿಗ್ನಲ್!

ನವದೆಹಲಿ: ದೇಶದ ಆರ್ಥಿಕ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಯೊಂದು ಶೀಘ್ರದಲ್ಲೇ ಜಾರಿಯಾಗಲಿದ್ದು, ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಶೀಘ್ರದಲ್ಲೇ 10 ಮತ್ತು 20 ರೂ. ಮುಖಬೆಲೆಯ ಪಾಲಿಮರ್ (ಪ್ಲಾಸ್ಟಿಕ್) ನೋಟುಗಳನ್ನು ಬಿಡುಗಡೆ ಮಾಡಲಿದೆ. ಆರ್‌ಬಿಐ ಸಲ್ಲಿಸಿದ್ದ ಈ ಪ್ರಸ್ತಾವನೆಗೆ ಕೇಂದ್ರ ಸರ್ಕಾರ ಅಧಿಕೃತವಾಗಿ ಒಪ್ಪಿಗೆ ಸೂಚಿಸಿದೆ. ಈ ಕುರಿತು ಹಣಕಾಸು ಖಾತೆ ರಾಜ್ಯ ಸಚಿವ ಪಂಕಜ್ ಚೌಧರಿ ಅವರು ಲೋಕಸಭೆಯಲ್ಲಿ ಮಾಹಿತಿ ನೀಡಿದ್ದಾರೆ.

ಆರಂಭಿಕ ಹಂತದಲ್ಲಿ ಪ್ರಾಯೋಗಿಕವಾಗಿ (Field Trial) ತಲಾ 100 ಕೋಟಿ (1 ಬಿಲಿಯನ್) ಮೊತ್ತದ 10 ಹಾಗೂ 20 ರೂಪಾಯಿಯ ಪ್ಲಾಸ್ಟಿಕ್ ನೋಟುಗಳನ್ನು ಮುದ್ರಿಸಲು ಕೇಂದ್ರ ಸರ್ಕಾರ ಗ್ರೀನ್ ಸಿಗ್ನಲ್ ನೀಡಿದೆ. ಪ್ರಾಯೋಗಿಕ ಪರೀಕ್ಷೆ ಯಶಸ್ವಿಯಾದ ಬಳಿಕ, ಈ ನೋಟುಗಳನ್ನು ನಿಯಮಿತವಾಗಿ ಚಲಾವಣೆಗೆ ತರಲು ಆರ್‌ಬಿಐ ಸಿದ್ಧತೆ ನಡೆಸಿದೆ.

ಪಾಲಿಮರ್ ನೋಟುಗಳ ವಿಶೇಷತೆ ಏನು?

ಪ್ರಸ್ತುತ ಚಲಾವಣೆಯಲ್ಲಿರುವ ಕಾಗದದ ನೋಟುಗಳು ಬೇಗನೆ ಹರಿದುಹೋಗುತ್ತವೆ, ಕೊಳೆಯಾಗುತ್ತವೆ ಮತ್ತು ನೀರಿನಲ್ಲಿ ಒದ್ದೆಯಾದರೆ ಹಾಳಾಗುತ್ತವೆ. ಅದರಲ್ಲೂ 10 ಮತ್ತು 20 ರೂ. ನೋಟುಗಳು ದೈನಂದಿನ ವಹಿವಾಟಿನಲ್ಲಿ ಅತಿ ಹೆಚ್ಚು ಬಳಕೆಯಾಗುವುದರಿಂದ ಅವುಗಳ ಆಯಸ್ಸು ಕಡಿಮೆ. ಆದರೆ, ಪಾಲಿಮರ್ (ಪ್ಲಾಸ್ಟಿಕ್) ನೋಟುಗಳು ಕಾಗದದ ನೋಟುಗಳಿಗಿಂತ 4 ರಿಂದ 5 ಪಟ್ಟು ಹೆಚ್ಚು ಬಾಳಿಕೆ ಬರುತ್ತವೆ. ಇವು ಬೇಗನೆ ಹರಿಯುವುದಿಲ್ಲ, ನೀರಿನಿಂದ ಒದ್ದೆಯಾಗುವುದಿಲ್ಲ ಮತ್ತು ಸುರಕ್ಷತೆಯ ದೃಷ್ಟಿಯಿಂದಲೂ ಇವುಗಳನ್ನು ನಕಲು ಮಾಡುವುದು (Fake notes) ಕಷ್ಟಸಾಧ್ಯ.

ಹಳೆಯ ಕಾಗದದ ನೋಟುಗಳು ರದ್ದಾಗುತ್ತವೆಯೇ?

ಇಲ್ಲ, ಹೊಸ ಪ್ಲಾಸ್ಟಿಕ್ ನೋಟುಗಳು ಮಾರುಕಟ್ಟೆಗೆ ಬಂದ ತಕ್ಷಣ ಹಳೆಯ ಕಾಗದದ ನೋಟುಗಳು ರದ್ದಾಗುವುದಿಲ್ಲ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಕೇಂದ್ರ ಸರ್ಕಾರ, ಪ್ರಸ್ತುತ ಚಲಾವಣೆಯಲ್ಲಿರುವ ಕಾಗದದ ನೋಟುಗಳನ್ನು ಹಿಂಪಡೆಯುವ ಯಾವುದೇ ಉದ್ದೇಶವಿಲ್ಲ ಎಂದು ತಿಳಿಸಿದೆ. ಪ್ಲಾಸ್ಟಿಕ್ ನೋಟುಗಳು ಹಾಗೂ ಕಾಗದದ ನೋಟುಗಳು ಎರಡೂ ಏಕಕಾಲದಲ್ಲಿ ಮಾರುಕಟ್ಟೆಯಲ್ಲಿ ಚಲಾವಣೆಯಲ್ಲಿ ಇರಲಿವೆ.

ಪಾಲಿಮರ್ ನೋಟುಗಳ ಮುದ್ರಣಕ್ಕಾಗಿ ಅಗತ್ಯವಿರುವ ಸಾಮಗ್ರಿಗಳನ್ನು ಪೂರೈಸಲು ಆರ್‌ಬಿಐನ ಮುದ್ರಣ ವಿಭಾಗವು (BRBNMPL) ಇತ್ತೀಚೆಗಷ್ಟೇ ಜಾಗತಿಕ ಟೆಂಡರ್ ಕರೆದಿತ್ತು. ಹಲವು ವರ್ಷಗಳಿಂದ ಚರ್ಚೆಯಲ್ಲಿದ್ದ ಈ ಯೋಜನೆಗೆ ಇದೀಗ ಕೇಂದ್ರ ಸರ್ಕಾರ ಅಂಕಿತ ಹಾಕಿರುವುದರಿಂದ, ಮುಂದಿನ ಕೆಲವು ತಿಂಗಳುಗಳಲ್ಲಿ ಹೊಚ್ಚಹೊಸ 10 ಮತ್ತು 20 ರೂ. ಪ್ಲಾಸ್ಟಿಕ್ ನೋಟುಗಳು ಜನಸಾಮಾನ್ಯರ ಕೈಸೇರುವ ನಿರೀಕ್ಷೆಯಿದೆ.